माटी के गीत:

          
                        
                        होइगै मोर धरोहर गायब...
                                           
                                            -चिंतन 'साकेतपुरी' 

चम्पा और चमेली गायब । 
फुलवन से ऊ खुश्बू गायब ॥
छोट छोट चीनी के आगे । 
बडी बडी गुड भेली गायब ॥ 

                              सरिया मह से धेनू गायब । 
                              माठा मह से नैनू गायब ॥ 
                              बडी बडी राइसमिल चलिगै ।
                              काँडी जांत पहरुवा गायब।।

खेतन से भय बरही गायब ।
ताले से भय नरई गायब ॥ 
घरे घरे अब नलका गडिगा ।
धन्न कुँवा पनिहारिन गायब ॥ 

                            रैन ना बोलै झींगुर गायब ।
                            जंगल मह से तीतिर गायब ॥ 
                            जब से रोटावेटर चलिगा ।
                            खेते मह से चीखुर गायब ॥ 

सगरे कै ऊ पानी गायब । 
नानी कै कहानी गायब ॥
जब से मिक्सर विक्सर चलिगा । 
सिल बट्टा कै चटनी गायब ॥ 

                          नदियां से भय नइया गायब । 
                          नइया कै खेवइया गायब ॥ 
                         अब कपार चढि कूकुर बइठे ।
                         सरिया मह से गइया गायब ॥ 

 बाइस्कोप कै दुनिया गायब ।
 जँघिया कै नचवइया गायब ॥
 जब से आर केस्ट्रा चलिगा ।
 बिरहा और बिरहिया गायब ॥

                         पंछी महै मटरिया गायब । 
                         मोरवा और मोरिनिया गायब ॥
                         खपड़ा से अब लिंटर परिगा ।
                        आँगन से गौरैया गायब ॥ 

 गन्ना कै रस गोरस गायब । 
सतुवा और चबइना गायब ॥
जब से कोकाकोला चलिगा ।
माठा कै पियवइया गायब ॥ 

                          माटी वाली हण्डी गायब ।
                          डिहवा पर कै झण्डी गायब ॥
                          जब से गैस सिलेण्डर चलिगा । 
                          चूल्हा पर से कण्डी गायब ॥

स्कूले कै दुद्धी गायब । 
पहिली वाली तख्ती गायब ॥
शिक्षा जब से बिजनेस बनिगा ।
बड़े बड़े कै बुद्धी गायब ॥ 

                        महुआ कै ऊ किसुली गायब । 
                        आमे कै ऊ जिबुली गायब ॥ 
                        लकड़कट्ट कै चोरी बढिगै । 
                        हरियर पेड़ कै सिल्ली गायब ॥ 

मेघ ना बरसै पानी गायब । 
गँउवन कै जवानी गायब ॥ 
बाग उजड के महल खडा अब ।
बइलन कै जवानी गायब ॥

                        हर जुवाठ कै मुठिया गायब ।
                        बाबा जी कै कुटिया गायब ॥
                        मोबाइल से होय भजन अब । 
                        मंगलचार कै गितिया गायब ॥ 

धानी रँग कै चिरिया गायब ।
शादी ब्याह कै भिरिया गायब ॥
वाइफ और हसबेण्ड बने । 
पति वन्दन वाली तिरिया गायब ॥ 

                        समुन्दर से सूती गायब । 
                        बाँसे कै ऊ पूती गायब ॥ 
                        बोलबेटा बालम् अब चलिगा । 
                        धोती कुर्ता गमछा गायब॥ 

गोझिया कै ऊ मोडनी गायब । 
रसोइँया से बढनी गायब ॥ 
जब से जींस और टाप सँचरि गा ।
कांधे पर से ओढनी गायब 

                        टिड्डा और टिटहरी गायब । 
                        पोखरा से भय सेहरी गायब ॥ 
                        जब से टीना टंकी चलिगै । 
                        माटी वाली डेहरी गायब ॥ 

 कह चिंतन " साकेतपुरी अब । 
 मन मा इहै विचार करैं ॥ 
 आवै वाली पीढी कइसे जानी।
 शिष्टाचार करै ॥